13:50 27 декабря 2014 г.
Лаш Таяпари почта çыхăну уйрăмне улттăмĕш çул Лариса Игнатьева ертсе пырать. Коллектив туслă. Кашни почтальонка хăйĕн тивĕçне çỹлти шайра пурнăçлать. Зинаида Арефьева, Ольга Иванова, Светлана Канжелева почтальонкăсем ял çыннисемпе кăмăллă калаçаççĕ, хаçат-журнала, пенси, пособи укçисене вăхăтра çитерсе параççĕ. Уйрăмах Çĕнĕ Эйпеç ялĕпе Адиково поселокĕнче пурăнакансем "Елчĕк ен" килессе чăтăмсăррăн кĕтнине пĕлтереççĕ.
- Ватăсем пире урама тухсах кĕтсе илеççĕ. Пенсионерсем район хыпарĕсемпе юратса, кăсăкланса паллашаççĕ, - теççĕ почтальонсем. - Çамрăксем пирки аплах калаймăн.
Лаш Таяпари почта çыхăну уйрăмĕнче кăçал "Елчĕк ене" 180 çемье илсе тăрать, 2015 çулхи пĕрремĕш çур çулта çырăнса илекенсен йышĕ тата ытларах.
В.Кириллова журналист С.Канжелева, З.Арефьева, О.Иванова почтальонкăсене ял çыннисене хаçатăн çĕнĕ номерне валеçме каяс умĕн ỹкерсе илнĕ.
Хисеплĕ вулаканăм! Сирĕн аллăрта район хаçачĕн Лаша çулĕнчи юлашки номерĕ. Сисĕнмесĕрех тепĕр çулталăк хыçа юлчĕ. Çак таранччен эсир пирĕнпе пĕрле пулнăшăн тав тăватпăр сире. Çавăн пекех çитес çул та пирĕнпе туслă пуласса шанатпăр.
Хаклă тусăм! 2015 çулхи пĕрремĕш çур çул валли (эрнере икĕ хутчен, 12 страницăпа тухакан районти мĕн пур хыпарсене шĕкĕлчекен хаçата) çырăнмасăр тăрса юлман-и эсĕ? Шутлă кунсем юлнă май аса илтеретпĕр: "Елчĕк ене" раштав уйăхĕн 30-мĕшĕчченех почта çыхăну уйрăмĕсенче, "Чувашпичет" киоскĕнче, хаçат редакцийĕнче çырăнтараççĕ. Почта çыхăну уйрăмĕсенче унăн хакĕ 349 тенкĕ те 20 пуспа (ара, район хаçатне вулас тесен пĕррелĕхе пĕр бутылка "хаяр шĕвекне" туянмасан та çылăх мар), редакцие килсе илме, "Чăваш пичет" АУО киоскĕнче (автовокзалта вырнаçнă вăл) вара унăн хакĕ пушшех йỹнĕ - ултă уйăх çырăнса илме те 165 тенкĕ кăна. Вăл укçапа паян лавккаран нимех те туянаймăн. Район хаçатне çырăнсан вара çур çул районăн ырă ĕçĕсемпе, çыннисемпе паллашăн, урамра сарăлакан тĕрлĕ сас-хурана ĕненмĕн. Çырăнăр, вулăр район хаçатне - çĕнĕ хыпар çитерĕ вăл кашнин патне.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»