13:04 29 ноября 2014 г.
2014 çулхи ноябрĕн 26-мĕшĕнче Чăваш Республикин Пуçлăхĕ Михаил Игнатьев "Чăваш Республикин Президенчĕн 2011 çулхи октябрĕн 7-мĕшĕнчи 90 №-лĕ Указне улшăнусем кĕртесси çинчен" Указа алă пуснă.
Çак Указ Чăваш Республикин территорийĕнче пурăнакан, ĕç стажĕ 37 çул та 6 уйăхпа (хĕрарăмсен) тата 42 çул та 6 уйăхпа (арçынсен) танлашакан граждансене "Чăваш Республикин ĕç ветеранĕ" ята парас правăна çирĕплетет: вĕсене пенси пама палăртсан е пенсие ватлăхпа тухма ирĕк паракан ỹсĕме çитсен. Унăн тĕллевĕ - аслă ăрăва патшалăх пулăшăвĕпе тивĕçтересси тата йĕркеллĕ пурăнмашкăн условисем туса парасси.
Чăваш Республикинче ĕç стажĕ 37 çул та 6 уйăхпа (хĕрарăмсен) тата 42 çул та 6 уйăхпа (арçынсен) танлашакан ĕç стажĕллĕ, пенси ỹсĕмне çитнĕ çынсем нумай çул ĕçлесе Чăваш Республикин социаллă пурнăçпа экономика аталанăвне пысăк тỹпе хывнă. Вĕсенчен 27 пин яхăнăшне ĕç стажĕ 40 çултан (хĕрарăмсен) тата 45 çултан (арçынсен) кая маррине шута илсе "Чăваш Республикин ĕç ветеранĕ" ят панă.
"Чăваш Республикин ĕç ветеранĕ" ята памалли ỹсĕм планкине 2,5 çул таран чакарни тепĕр 26 пин граждана ĕç ветеранĕсем валли çирĕплетнĕ социаллă пулăшу мерисемпе усă курмашкăн май парать. Хальхи вăхăтра Чăваш Республикин ĕç ветеранĕсен социаллă пулăшу - уйăхсерен паракан 1082 тенкĕ тата çыхăну пулăшăвĕсен тỹлевĕн 50 проценчĕ чухлĕ укçа компенсацийĕ - илме право пур.
Асăннă Указ 2015 çулхи июнĕн 1-мĕшĕнчен вăя кĕрет.
Чăваш Республикин Президенчĕн М.Игнатьевăн 2011 çулхи октябрĕн 7-мĕшĕнчи 90 №-лĕ Указĕ вăя кĕнĕ хыççăн районти 711 çын ĕç стажĕпе "Чăваш Республикин ĕç ветеранĕ" ята тивĕçнĕ. Социаллă пулăшу мерисемпе пурĕ 3427 ĕç ветеранĕ усă курать.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»