09:25 20 сентября 2014 г.
2015 çулхи çу уйăхĕн 9-мĕшĕнче фашистла Германие çапса аркатса Аслă Çĕнтерỹ тунăранпа 70 çул çитет.
Çак паллă куна халалласа "Елчĕк ен" хаçат редакцийĕ тĕрлĕ ỹсĕмри вулакансен хушшинче "Аслă Çĕнтерĕве - 70 çул" ятпа конкурс ирттерме палăртать. Унта хутшăнакансем Аттелĕхĕн Аслă вăрçин ветеранĕсем, вĕсен пурнăçĕ тата çапăçури паттăрлăхĕ, тыл ĕçченĕсен вăрçă вăхăтĕнчи пурнăçĕпе ĕçĕ-хĕлĕ пирки тĕрленчĕк, очерк, статья çырма пултараççĕ.
Конкурс кăçалхи авăн уйăхĕн 15-мĕшĕнчен пуçласа 2015 çулхи çу уйăхĕччен тăсăлать. Ĕçсене тишкернĕ май жюри членĕсем темăна тарăннăн уçса панине, фактсене тĕрĕс палăртнине, хайлав çырас йĕркене çирĕп пăхăннине тĕпе хурĕç. Чи лайăх хайлавсене палăртнă май виçĕ жанрти çĕнтерỹçĕсене 3-шер вырăн парăпăр, мала тухнисене укçан премипе хавхалантарăпăр.
Ĕçсене эсир пирĕн патăмăра элетронлă адреспа ярса е редакцие кĕрсе пама пултаратăр. Ĕçе кам пурнăçланине (хушамат, ят, аçăр ячĕ), тулли адресăра тата телефон номерне çырма тата "Конкурса" тесе палăртма ан манăр.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»