08:59 20 сентября 2014 г.
Мускавра Чăваш Ен Пуçлăхĕ Михаил Игнатьев РФ граждан оборони, чрезвычайлă лару-тăру тата çут çанталăк инкекĕсен сиенне пĕтерес енĕпе ĕçлекен министрĕпе Владимир Пучковпа тĕл пулнă.
Республика Пуçлăхĕ юлашки 5 çулта чрезвычайлă лару-тăрура, пушарсенче, шыв объекчĕсенче вилнисен шучĕ чакнипе çыхăннă туртăм палăрни çинчен пĕлтернĕ, çакă профилактика ĕçĕн тухăçлăхне çирĕплетет. Кăçалхи авăн уйăхĕн 11-мĕшĕ тĕлне пушарсенче 331 çынна çăлнă. Ку пĕлтĕрхи çак тапхăртинчен 20,4% нумайрах. Вут-çулăм кỹнĕ сиен виçи 25,6% пĕчĕкленнĕ.
Владимир Пучков Чăваш Ен юлашки çулсенче кал-кал аталанни, çынсен пурнăçне лайăхлатмалли проектсене ăнăçлă пурнăçлани çинчен каланă. МЧС аварипе çăлав продукцийĕн производствипе çыхăннă саккассене Чăваш Енри предприятисене памалли майсене тишкерме хатĕррине çирĕплетнĕ. Çавăн пекех вăл РФ МЧСĕн республикăри управленийĕн çуртне реконструкцилеме тата Шупашкарта Кризислă лару-тăрури управлени центрне туса хума 80 млн тенкĕ уйăрмашкăн йышăнни çинчен пĕлтернĕ. Асăннă центрта çĕнĕ йышши информаци технологийĕсемпе усă курĕç.
Тĕл пулура Шупашкарти Петров урамĕнчи 5 хутлă çурт подъезчĕ ишĕлнĕ май çĕнĕ çурт тума каякан тăкаксен пĕр пайне саплаштарма çурт-йĕр сертификачĕсем уйăрас, çĕнĕ пушар деповĕн штатне пысăклатас, ăна аварипе çăлав техникипе тивĕçтерес, çавăн пекех Шупашкар тата Чăваш автономийĕн юбилейĕсене уявламалли тĕп мероприятисен планне пурнăçлас ыйтусене те сỹтсе явнă.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»