09:29 30 августа 2014 г.
Çакăн çинчен пĕлтернĕ Михаил Игнатьев Дмитрий Медведев премьер-министра
Çурла уйăхĕн 27-мĕшĕнче Чăваш Ен Пуçлăхĕ Михаил Игнатьев Мускавра 2014-2015 çулти вĕренỹ тытăмне хатĕрленсе çитнипе çыхăннă канашлăва хутшăннă. Ăна Раççей Федерацийĕн Правительствин Председателĕ Дмитрий Медведев видеоконференци мелĕпе ирттернĕ.
Дмитрий Медведев палăртнă тăрăх - Раççей Федерацийĕн субъекчĕсенче ача сачĕсене лекес текенсен черечĕ самай пĕчĕкленнĕ, вĕсенче çĕнĕрен тата 400 пин вырăн хушăннă. Кăçал тата 350 пин вырăн пулĕ.
"Авăн уйăхĕн 1-мĕшĕ тĕлне 43 пине яхăн шкул хăйĕн алăкĕсене уçĕ, вĕсем валли çĕнĕ вĕренỹ хатĕрĕсем, спорт инвентарĕ, шкул автобусĕсем туяннă. Шкулсен 95 процентне Интернетпа çыхăнтарнă. 57 регион, çав шутра Крым та, учебниксемпе тата вĕренỹ хатĕрĕсемпе 100 проценчĕпех тивĕçтернĕ", - тенĕ Дмитрий Медведев.
Чăваш Ен Пуçлăхĕ Михаил Игнатьев Дмитрий Медведев премьер-министра республикăри пĕтĕмĕшле пĕлỹ паракан пур шкул та ачасене йышăнма хатĕрри çинчен каланă. Çĕнĕ вĕренỹ çулĕнче пĕрремĕш класа пĕлтĕрхинчен 500 ача ытларах каять. Вĕренỹ çулне хатĕрленме пурĕ 1 млрд та 800 млн тенкĕ хывнă. Михаил Игнатьев çавăн пекех Украинăран вăхăтлăха тарса килнĕ çынсен 133 ачи пĕтĕмĕшле пĕлỹ паракан шкулсенче вĕренме пуçласси тата 45 ача садиксене çỹреме тытăнни çинчен каланă.
Республика Пуçлăхĕ пĕлтернĕ тăрăх - яллă вырăнсенчи 26 шкулта спорт залĕсене тĕпрен юсанă. Çак тĕллевпе 22 млн тенкĕ ытларах усă курнă. М.Игнатьев çакна та пĕлтернĕ: енчен те хăш-пĕр регионсем спорт залĕсене юсама хăйсен енчен хушма укçа тупаймасан Чăваш Республики çак тĕллеве пурнăçлама тата 13 млн тенкĕ илме пултарать.
Кĕске справка. 2014-2015 вĕренỹ çулĕнче Чăваш Республикинче 1076 вĕрентỹ учрежденийĕ ĕçлĕ. Вĕсенче 351 пин ачапа çамрăк вĕренĕ, воспитани, хушма пĕлỹ илĕ. Кăçал республикăри вĕрентỹ учрежденийĕсене çĕнĕ вĕренỹ çулне хатĕрлеме мĕн пур бюджетран 750 млн тенкĕ уйăрнă.
Республикăри мĕн пур шкула хăрушсăрлăх кнопкипе тивĕçтернĕ (çĕр-шывра - 86,5%). Пĕтĕм шкул ачине тỹлевсĕр учебниксем панă: юлашки 3 çулта çак тĕллеве пурнăçлама 500 млн тенкĕ уйăрнă (2014 çулта - 129 млн тенкĕ). Юлашки 4 çулта 214 шкул, çав шутран 2014 çулта 24 вĕрентỹ учрежденийĕ, столовăйсем валли ку чухнехи оборудованисем (10 пин штук) илнĕ. Республикăри шкул ачисен 96% вĕри апатпа тивĕçтереççĕ.
Юлашки 3 çулта Чăваш Енре 23 ача садне ĕçе кĕртнĕ е тĕпрен çĕнетнĕ, 14 пин ача çỹретмелли хушма вырăн тунă. Çак тĕллеве пурнăçлама 2 млрд тенкĕ ытларах укçа уйăрнă. Кăçал республикăра 14 çĕнĕ садик ĕçе кĕртме, 9 ача садне тумашкăн пуçăнма палăртнă.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»