10:26 24 июля 2014 г.
300 ытла çул каялла йĕркеленнĕ Тинĕс-Çар флочĕ Раççей çĕр-шывне чи хăватлисен йышне кĕме май пачĕ. Кунта пирĕн моряксен çарти паттăрлăхĕпе çĕнтерĕвĕсем пирки çеç сăмах пымасть. Тинĕс-Çар флочĕ Раççейшĕн çĕнĕ çĕрсене уçма та пулăшнă. Çĕр-шыв кун-çулĕнче Сенявин, Ушаков, Нахимов ячĕсемпе юнашар Лисянский, Крузенштерн, Беллинсгаузен, Лазарев ячĕсем те çиçеççĕ. Халĕ, планета картти çинче "шурă пăнчăсем" юлман пулин те, Тинĕс-Çар флочĕ Тăван çĕр-шыва хỹтелессипе палăрса тăрать. Унăн хăвачĕ - моряксен аслă ăрăвĕсен çапăçусенче туптаннă йăли-йĕркинче. Тинĕс-Çар флочĕн ветеранĕсене уяв ячĕпе чун-чĕререн саламлатпăр, сирĕн умăрта пуç таятпăр. Паян Елчĕкре Тинĕс-çар флотĕнче службăра пулнисем тăрăшнипе палăк уçăлать. Пирĕн ентешсем чăннипех мухтава тивĕç - мирлĕ пурнăçра вĕсен тỹпи те пур. Çирĕп сывлăх та ăнăçу сунатпăр сире, моряк-ветерансем!
Р.МОЛОДОВА,
район пуçлăхĕ.
Н.МИЛЛИН,
район администрацийĕн пуçлăхĕ.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»