10:22 14 октября 2013 г.
Юпа уйăхĕн 11-мĕшĕнче Патреккелти ял библиотекине вулавăш çумĕнчи "Сударушка" клуб членĕсем пуçтарăнчĕç. Вĕсем "Елчĕк ен" хаçатăн çырусен пайĕн редакторĕн "Сиплев утравĕ" ятпа пичетленсе тухнă кĕнекине хакларĕç. Презентацие Валентина Алексеевнăн ĕçтешĕ Е.Петрова, Елчĕкри тĕп вулавăшри Р.Лазарева библиотекарь те хутшăнчĕç.
Пуçтарнăнисен умĕнче чи малтанах Нина Чернова учитель-пенсионер сăмах илчĕ. Калавсене вуланă май чуна хускатнă самантсем çинче чарăнса тăчĕ ĕнерхи вĕрентекен кĕнекене тишкернĕ май. Авторăн чĕлхи пуяннине, кĕнеке çăмăллăн вуланнине, паттăрсем чуна хумхатнине палăртрĕ.
Çак шухăшсене Людмила Скворцова, Нина Владимирова, Елизавета Палашкина тата ыттисем те ырларĕç, кĕнеке кăларакана малашлăх ĕçре пысăк та сулмаклă утăмсем сунчĕç.
Каярах презентацие хутшăннисем Тамара Захарова хатĕрленĕ "Чуна çывăх кĕнеке" куравпа, "Чăваш кĕнеки - кăмăл ăшши" буклетпа паллашрĕç, В.Кирилловăна саламласа юрăсем шăрантарчĕç.
Т.ЗАХАРОВА.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»