00:00 27 февраля 2013 г.
Елчĕк район администрацийĕ çỹмĕнчи комиссин черетлĕ ларăвĕ иртрĕ. Ăна район администрацийĕн пĕрремĕш çумĕ Л.Левый ертсе пычĕ. Ларăва редакци ĕçченĕсем те хутшăнчĕç.
Ларура комисси членĕсем административлă 4 ĕç пăхса тухрĕç. 4 ĕçрен 2-шĕ - Чăваш Республикин "Чăваш Республикинче административлă право йĕркине пăсни çинчен" саккунĕнчи 10 статьяна пăснипе çыхăннă. Тирпейлĕх йĕркине пăхăнмасăр Курнавăш ялĕнчи 2 хуçалăх çỹп-çап миххисене Комсомольски-Елчĕк автоçулăн Çуткỹл ялĕ тĕлĕнчи чарăнăва кайса пăрахнă.
Кил хуçисем çуп-çапа чарăнăва пăрахнине йышăнчĕç. Вĕсенчен пĕри мусор миххине хулана каякан ачисенчен парса янине тунмарĕ. Асăннă граждансене комисси членĕсем саккунпа килĕшỹллĕн штрафлама йышăнчĕç.
Çĕнĕ Арланкасси тата Лаш Таяпа ялĕсенче пурăнакан 2 гражданин вара йыттисене кăкаркăçра тытманшăн айăпланчĕç. Ирĕкри йытăсем çынсене хăратнă тĕслĕхсем пулнă. Йытăсен хуçисене 1000-шер тенкĕ штраф пама йышăнчĕç комисси членĕсем. Çỹп-çапа чарăнусене е ытти вырăна пăрахакансемпе, административлă ытти йĕркесене пăсакансемпе малашне те вирлĕн кĕрешес ĕçе вăйлатмаллине палăртрĕç ларăва хутшăннисем.