Новости » Эпир мар-и, эпир мар-и - вăйлисем

Эпир мар-и, эпир мар-и - вăйлисем Иртнĕ ĕмĕрĕн 50-мĕш çулĕсенчен пуçласа çак ĕмĕр вĕçлениччен пирĕн районти кире пуканĕ йăтакансем республикăра, Раççейре тăтăш палăрчĕç, нумай-нумай ăмăртусенче çĕнтерчĕç. Аслă Елчĕкри А.Горшков республикăра чи малтан РСФСР спорт мастерĕн нормативне пурнăçланăччĕ. Ун хыççăн ыттисем те пысăк çитĕнỹсем турĕç. Анчах каярахпа спортăн çак енĕпе интересленекенсен йышĕ чакрĕ. Районти кире пуканĕ спорчĕн федерацийĕн председательне Олег Федорова суйласа лартнă хыççăн лару-тăру лайăх енне улшăнчĕ. Федераци кире пуканĕ спорчĕпе интересленекенсене пĕр чăмăра пуçтарма, районта спорт ăмăртăвĕсене ытларах ирттерме тытăнчĕ. Олег Федоров пуçарăвĕпе йĕркеленсе кайрĕ те ĕнтĕ "Елчĕк ен" хаçат призĕсене çĕнсе илессишĕн ăмăрту 13 çул каялла. Виçĕм кун ачасемпе çамрăксен спорт шкулĕнче черетлĕ турнир иртрĕ. Унăн участникĕсене саламланă май район администрацийĕн пуçлăхĕн тивĕçĕсене пурнăçласа пыракан Л.Левый, район хаçачĕн тĕп редакторĕ Н.Алексеев кире пуканĕ спорчĕ районта лайăх аталанса, ку енĕпе Елчĕксем малта пынине палăртрĕç, спортра пысăк çитенỹсем тума, сывă пурнăç йĕркине тытса пыма ырă сунчĕç. Кăçалхи ăмăрту йышĕ чи пысăкки пулчĕ - унта 200 ытла кире пуканĕ йăтакан хутшăнчĕ. 2000 çулта тата унран каярах çуралнă ар-çын ачасемпе хĕр ачасем помост çине тухрĕç. Кĕçĕн Таяпа шкулĕнчи А.Семенова 8 кг кире пуканне 150 хутчен сулласа йăтрĕ, пĕрремĕш вырăна тухрĕ. Иккĕмĕшпе виççĕмĕш вырăнсенче - А.Козлова (Çуткỹл), А.Краснова (Елчĕк). Арçын ачасенчен В.Мясников (Курнавăш) икĕ енлĕ ăмăртура 274 очко пуçтарса çĕнтерỹçĕ пулса тăчĕ. Иккĕмĕшпе виççĕмĕш вырăнсенче - А.Смирнов (Курнавăш), А.Иванов (Кушкă). 1997 çулта çуралнă тата унран çамрăкрах хĕр ачасем хăйсен виçисенче çĕнтерчĕç: В.Маркова (Курнавăш), Ю.Николаева (Кĕçĕн Таяпа), А.Волкова (Хăвăлçырма), Д.Зайцева (Çĕнĕ Пăва), М.Веселина (Курнавăш), В.Кошкина (Кĕçĕн Таяпа). Çак ỹсĕмри арçын ачасем хушшинчи çĕнтерỹçĕсем: К.Иванов (Тăрăм), А.Макаров (Кĕçĕн Таяпа), С.Голубев, Н.Григорьев (Курнавăш), В.Зайцев (Çĕнĕ Пăва), М.Воронцов, А.Кожевников, А.Журавлев (Елчĕк). 1996 çулта çуралнă тата çамрăкрах хĕрсен ушкăнĕнче А.Орлова, М.Никитина (Елчĕк), каччăсен ушкăнĕнче Д.Веков, Н.Николаев (Курнавăш), А.Марковпа Н.Гаврилов (Кушкă) мала тухрĕç. Спорт ветеранĕсем те помост çинче хăйсен пултарулăхне кăтартрĕç. 60 çула çитичченхи ушкăнра П.Петрушкин 16 кг кире пуканне 189 хутчен сулласа йăтрĕ. Унтан аслăрах ушкăнра 61 çулхи А.Анисимов (Ĕнел) тата 74 çулхи Г.Туманов (Çĕнĕ Эйпеç) тупăшрĕç. Çамрăк çамрăках çав. А.Анисимов 16 кг кире пуканне 181 хутчен, Г.Туманов 90 хутчен сулласа йăтрĕç. Çакă мар-и çамрăксемшĕн ырă тĕслĕх? Пĕтĕмĕшле пĕлỹ паракан тĕп шкулсен ушкăнĕнче Кĕçĕн Таяпасем çĕнтерчĕç. Иккĕмĕшпе виççĕмĕш вырăнсенче - Кивĕ Эйпеç тата Çуткỹл шкулĕсен командисем. Вăтам шкулсем хушшинче Курнавăш шкулĕнчи кире пуканĕ йăтакансем мала тухрĕç. Пьедесталăн иккĕмĕшпе виççĕмĕш вырăнĕсенче - Елчĕксем тата Çĕнĕ Пăвасем. Уйрăм виçесенче çĕнтернĕ атлетсене районта тухса тăракан "Елчĕк ен" хаçата 2013 çулхи пĕрремĕш çур çулта илсе тăма тỹлевсĕр çырăнтарса параççĕ. Çĕнтерỹçĕсемпе призерсене район хаçачĕн Хисеп грамотисене парса чысларĕç. "Елчĕк ен" хаçат редакцийĕ ăмăртăва ирттерсе яма пулăшнă спорт тусĕсене чĕререн тав тăвать.