00:00 10 августа 2012 г.
Çурла уйăхĕн 10-мĕшĕнче "Елчĕк ен" хаçат редакцийĕ хăйĕн 80 çулхи юбилейне паллă турĕ. Уяв кĕрекине çак кун хаçатçăсемпе полиграфистсем, ялкорсемпе хăнасем пуçтарăнчĕç. Пуçтарăннисен умĕнче чи малтанах Н.Алексеев тĕп редактор сăмах илчĕ, район хаçачĕн кун-çулĕ çинче чарăнса тăчĕ. Шăп 80 çул каялла районта парти райкомĕпе райсовет ĕçтăвкомĕн тата районти профсоюзсен совечĕн пичет органĕ - "Колхоз ялавĕ" тухса тăма пуçланине, район хаçачĕ тỹрремĕнех район пурнăçĕпе тата унăн историйĕпе тачă çыхăннине палăртрĕ, асра юлнă пулăмсем çинче чарăнса тăчĕ. Журналистсемпе пичет ветеранĕсене, обществăлла корреспондентсене Елчĕк район администрацийĕн пуçлăхĕ Н.Миллин саламларĕ. Уяв сăмахĕсен çумне килнĕ хăна - Чăваш Республикин Патшалăх Канашĕн Председателĕн çумĕ А.Князев хутшăнчĕ, ăнăçусемпе çитĕнỹсем сунчĕ. Ĕçре палăрнисем Чăваш Республикин Патшалăх Канашĕн, Елчĕк район пуçлăхĕн, профсоюз райкомĕн Хисеп хучĕсене тивĕçрĕç.