16 августа 2017 г.
Часах шкулсем ачасен хаваслă сассипе тулĕç. Çĕнĕ вĕренỹ çулĕ тĕлне пур шкула та вĕренỹ учебникĕсемпе тивĕçтерес тесе Чăваш кĕнеке издательстви нумай вăй хучĕ. Мĕнле пособисем сĕнет-ха издательство?
Чи малтанах вырăсла пĕлỹ паракан шкулсенчи 9-мĕш классем валли Г.В.Абрамован "Чăваш чĕлхи" вĕренỹ пособийĕ кун çути курчĕ. Ку кăларăм пĕрремĕш хут пичетленчĕ. Вăл хăнăхтарусемпе тата тĕрлĕ тĕслĕ ỹкерчĕксемпе пуян. Унсăр пуçне 3-мĕш, 4-мĕш тата 5-мĕш классем валли хатĕрленĕ "Чăваш чĕлхи" çĕнĕрен пичетленсе тухрĕ.
Çавăн пекех вырăсла вĕрентекен хула шкулĕсенче ачасем В.Г.Игнатьевăн, Н.Н.Черновăн, Л.В.Николаевăн "Чăваш чĕлхи" вĕренỹ пособийĕпе те чĕлхе пĕлĕвне пуянлатĕç. Кăçал унăн 3-мĕш тата 4-мĕш классенче вĕренекенсем валли çĕнĕ кăларăмсем пичетленчĕç.
Чăвашла вĕрентекен шкулсем валли те Чăваш кĕнеке издательствин "кăмакинче" çĕнĕ вĕренỹ пособийĕсем "пиçсе тухрĕç": Л.П.Сергеев ытти авторсемпе пĕрле хатĕрленĕ "Чăваш чĕлхи" (3-мĕш тата 5-мĕш классем), Ю.М.Виноградовпа А.Р.Федорова çырнă "Чăваш чĕлхи" (4 класс), Т.В.Артемьевăпа О.И.Печников пухса хатĕрленĕ "Литература вулавĕ" (3-мĕш тата 4-мĕш классем).
О.ФЕДОРОВА.