00:00 07 марта 2012 г.
Раççей Федерацийĕн Президенчĕн суйлавĕ хыçа юлчĕ. Ăна тивĕçлипе хатĕрленсе ирттерес тĕллевпе суйлав участокĕсен комиссийĕсем пысăк тăрăшулăхпа палăрчĕç. Суйлавçăсем валли куравсем йĕркелесси çине уйрăмах пысăк тимлĕх уйăрчĕç комисси членĕсем. Патреккел ялĕнчи культура çуртĕнче вырнаçнă 1111 номерлĕ суйлав участокĕн комиссийĕн членĕсем (кунта секретарь тивĕçне "Елчĕк ен" хаçатăн обществăпа политика пайĕн редактор Е.Петрова пурнăçланă) Патреккелти тĕслĕх библиотека çумĕнче ĕçлекен "Сударушка" кружок членĕсен (А.Ишмуратова, В.Сироткина, Н.Львова) алă ĕçĕсенчен тата Патреккел шкулĕнче 6-мĕш класра вĕренекен К. Марковăпа В. Петров ĕçĕсенчен куравсем йĕркелерĕç. Карина хутран тĕрлĕ чĕрчунсемпе акăшсем, Владимир "Илемлĕ манăн тăван тăрăх" темăпа сăн ỹкерчĕксем хатĕрленĕ. Патреккелте суйлав лăпкă, кăлтăксăр иртнĕ. Суйлава суйлавçăсен 98,5 проценчĕ хутшăннă. 502 суйлавçă В.Путиншăн (85,8 процент), 46-шĕ - Г.Зюгановшăн (7,9 процент), 13-шĕ С.Мироновшăн (2,2 процент), 10-шĕ В.Жириновскийшĕн (1,7 процент), 8-шĕ М.Прохоровшăн (1,4 процент) сасăланă. Çак кун суйлава пуçласа хутшăннă В.Сенькина, Э.Енейкин, О.Максимова парнесене тивĕçнĕ.